Elsku vinir, fjölskylda og aðrir sem ramba inn á síðuna.

Það er allt meiriháttar að frétta af rokkfjölskyldunni. Við erum bara allt of uppteknar til að blogga.  Á milli þess sem við eltum orminn okkar (lesist Þóri Sólbjart) þá erum við á faraldsfæti. Búnar að fara til Boston og Spánar og svo skelltum við okkur á nýjan tjaldvagn um daginn og erum búnar að vera í 2 mögnuðum útilegum. Í annarri lentum við í hitabylgju en í hinni í “flóðbylgju”, það var svo mikil rigning. 

Þórir Sólbjartur dafnar svakalega vel, jafnvel of vel.  Hann er byrjaður að safna smá ístrubelg sem hann skautar um íbúðina á. Hann skríður nefnilega ekki eins og flestir krakkar heldur ormast hann um með því að draga sig áfram á bumbunni og tærnar hjálpa líka til. Á Spáni tók hann svo massa miklum framförum að við  ákváðum að pakka göngugrindinni þannig að hún hefur ekki verið í notkun í 2 mánuði núna.  Það er ekki enn komin tönn þó hann sé að verða 9 mánaða eftir nokkra daga.  Hárið sem var rauðbrúnt er eiginlega bara hvítt, hann er algjör glókollur (þið sjáið það betur í næstu myndaseríu sem ég ætla að reyna að setja inn í næstu viku).

 Það eru komnar inn myndir frá því í maí en þá fórum við m.a. til Boston með Thor Sunshine og slóg hann feitt í gegn hjá Könunum….  Við ætlum að reyna að setja inn myndir frá júní (t.d. Spáni) áður en við förum í næsta langa ferðalag en á fimmtudaginn höldum við í tveggja vikna ferðalag um Vestfirði og Strandir. Byrjum á Bolungavík þar sem fjölskyldan mín (Ínu) á hús og ferðumst eitthvað út frá því og förum svo á Dranga á Ströndum þar sem fjölskylda Kiddu á hús.  Erum núna á leiðinni á Laugavatn í sextugsafmæli föður míns sem á afmæli á morgun. Þar verður slegið upp mini útihátíð. 

 Video af Poja í baði (pínu gamalt)

Þar til næst…..

Mig langar að byrja á að þakka kærlega fyrir allar kveðjurnar bæði hér á síðunni og með SMS í tilefni afmælisins míns og prófloka sem vill nú svo skemmtilega til að voru sama daginn (28. apríl).  Í tilefni dagsins brugðum við stelpurnar okkur af bæ og fórum á Tapas barinn.  Þar rifjuðum við upp góða takta frá því í ferðalagi okkar um Spán í fyrra.  Við pöntuðum okkur 12 rétti, Laufey var strax með á hreinu hvað hún vildi. Hún pantaði sér kengúru, pírí pírí kjúkling, hvítlaukssnigla og patatas bravas.  Kidda var á hefðbundnari nótum, lamb í lakkríssósu, nautakjöt í teríakí sósu, humar í hvítlauk og túnfiskur.  Ég fékk hins vegar 4 rétti að vali kokksins og fékk reyktan lunda í bláberjabrennivínssósu, hörpuskel í beikondöðluvafningi, lambaspjót og humar/hörpuskel í einhverri gratineringu.  Þetta var allt meiriháttar gott en við vorum þó sammála um að lundinn stóð uppúr, þá hörpuskelin í beikondöluvafningi og kengúran.  Namminamminamm…..  vonandi verður góður tapas staður þar sem við verðum á Mallorca í sumar.

 Já við rokkfjölskyldan erum sem sagt að fara að bregða fyrir okkur betri fætinum í sumar.  Ferðalögin byrja reyndar strax í á morgun (4. maí) en þá fer ég til New York og þaðan til Boston á námskeið í persónulegum fjárfestingum.  Kidda og Þórir munu svo koma til Boston á fimmtudaginn og þá verður tekið á því í búðunum.  Þórir verður bara ólaður niður í vagninn og við örkum af stað….Laufey greyjið verður skilin eftir heima þar sem hún er hætt á brjósti en hún fær kannski sokkapar til að bæta það upp.  Heimkoma 13. maí.

28. maí verður síðan haldið til Mallorca í boði ma og pa a la grande í Innri Njarðvík town.  Þau eru sem sagt að verða sextug í sumar og ákváðu að bjóða “hele familien” með í utanlandsferð.  Þetta verða s.s. 2 ömmur, mamma og pabbi, systkyni mín 3, einn maki og 14 börn á aldreinum 6 mánaða til 14,5 árs.  Já og síðast en ekki síst Lilja móðursystir .  Við verðum á Mallorca í 3 vikur en fyrstu vikuna verðum við bara með Ella og er planið að taka ferju til Barcelona og gista þar eina nótt.

Síðar í sumar er stefnan tekin á Dranga, í Bolungavík, á ættarmót og til Gautaborgar.  Og hvað þurfa konur ekki að vinna?  Ég er s.s. hætt hjá HugAx og er með tvennt annað í pípunum sem ekki er hægt að segja frá strax.   Sumarið verður sem sagt hlaðið orlofi.  Ekkert smá gaman.

Ég veit að margir kíkja inná síðuna til að fá fréttir af Þóri litla Sólbjarti Ínusyni Rokk og loksins koma þær.  Loksins er drengurinn orðinn kenndur við Ínu mömmu sína eftir smá þras við þjóðskrá.  Það virðist hið flóknasta mál að fá hann kenndan við hina mömmuna, þeir krefjast skriflegrar yfirlýsingar frá læknastofunni og okkur og alls kyns rugl. Hins vegar ef kona heldur fram hjá manninum sínum þá verður sá lausaleikskrói sjálfkrafa kenndur við eiginmanninn og enginn er spurður að neinu.  Sem sagt allt of flókið kerfi utan um ekki neitt.

Þórir varð 6 mánaða núna 27 apríl og er orðinn algjör gaur. Hann tók fyrstu veltuna á eigin vegum þann 11. apríl en núna veltir hann sér hring eftir hring í báðar áttir.  Hann er líka farinn að sitja og svo labbar hann um allt í göngugrindinni. Svo ég tali nú ekki um hvað hann er sjúklega handóður. Ég veit ekki hvort þetta sé alveg normal fyrir ekki eldra barn, mér finndist hann allavega alveg mega vera lilli dúlli aðeins lengur .  Hann er líka farinn að borða fjölbreyttari fæðu, kartöflur og grænmeti, ávexti og grauta.  Það bólar hins vegar ekkert á tönnslunum sem við vorum sannfærðar um að kæmu snemma.  Hann er s.s. tannlaus greyjið…..

Þórir er þó alveg einstaklega tillitsamur. Til að mynda þá varð hann veikur í fyrsta skipti eftir hádegi daginn sem ég kláraði prófin.  Við Þórir erum því búin að vera tvö innilokuð alla vikuna því Kidda var að leggja parket og fleira.  Hann er nú allur að koma til núna en við þurftum að fá smá púst fyrir hann.  Eyrun hafa þó sloppið hingað til 7-9-13.  Það er algjör lúxus að vera með heimilislækni í fjölskyldunni sem getur tékkað á því þegar mömmurnar fá panic attac.

Ég er að vinna í því að hlaða inn myndum frá því í mars en það tekur heila eilífð.  Gæti verið vegna þess að tölvan er þráðlaus, er þó ekki viss.  Kíkið endilega beint á myndasíðuna okkar http://www.flickr.com/photos/rokkfamily/.

Þeir sem eru enn að lesa eru ekkert smá duglegir því þetta er orðin svakalega langur texti en svona er það þegar maður er of upptekinn til að blogga reglulega.

Kveðja frá Rokkfjölskyldunni – Ína Björk

Elsku vinir og fjölskylda það er í besta lagi með okkur þríeykið.  Það var bara erfitt að komast í tölvuna í Barcelona og við vorum líka svo hrikalega mikið að gera hjá okkur alla daga.  Við nýttum hverja einustu mínútu til hins ítrasta.  Við vorum í Barcelona frá sunnudegi til laugardags og fórum í Gaudi garðinn, Tibitabo tívolíið, að versla, á ströndina í Sitges, að versla, skoðuðum kirkjuna, La Sagrada familia sem er algjört snilldarverk, skoðuðum gosbrunna lasersjó en það gekk ekki stóráfallalaust fyrir sig því einhverjir glæpaunglingar skáru á dekkið hjá okkur.  Laufey leynilögregla varð vitni að þessu og en mæður hennar trúðu henni ekki sögum mikilla sagnahæfileika hennar sem eiga það til að fara út fyrir mörk hins raunverulega .  Við vorum sem betur fer svo rænulausar að við föttuðum þetta ekki fyrr en við vorum búnar að keyra einhverja vegalengd  og leggja þar að auki.  Þannig að pörupiltarnir höfðu ekki árangur sem erfiði í þessu tilfelli en augljóst var að þeir ætluðu að ræna okkur. 

Hápunktur heimsóknarinnar til Barcelona var þó að okkar mati æðisleg töffarahjólaleiga þar sem við leigðum okkur hjól í tvígang og hjóluðum út um ALLA BORG. Það er alveg frábært að hjóla í Barcelona því það eru hjólabrautir mjög víða. Með þessu móti fengum við fengum við aðra sýn á borgina og sáum miklu meira af henni en við hefðum ella gert. 

Við fundum besta tapasbar ferðarinnar í Barcelona eða allavega þar sem var mesta úrvalið af góðum réttum. Við fórum þangað þrisvar í ferðinni…..TXAPELA og er hann neðarlega á Gracia breiðstrætinu.  Við mælum eindregið með þessum stað. 

Við flýttum ferð okkar frá Barcelona því við vorum farnar að þrá rólegheitarlíf og hreinlæti og lögðum við því af stað á laugardegi í stað þriðjudags á La Colina í Albir þar sem ma og pa og Brynja biðu okkar óþreigjufull .  Ferðin þangað gekk stórkostlega og náðum við að klára að hlusta á glæpasöguna sem við höfum verið að hlusta á á leiðinni í bílnum frá því við lögðum af stað frá Granada.

Á La Colina höfum við “tjillað” og “tjillað” og erum við loksins á góðri leið með að “hel-tana” okkur. Við verðum ógeðslega súkkulaði brúnar þegar við komum heim…..

Við mætum á klakann um miðnætti á laugardagskvöld, blóm og kransar eru vinsamlegast afþakkaðir en við verðum á heimaslóðum á sunnudaginn í brjáluðu stuði. Verið velkomin.

Látum þetta duga að sinni, meira eftir að heim verður komið.

Ykkar

Kína og Lovely