Í gær var þjóðhátíðardagur samkynhneigðra á Íslandi eða Gay Pride.  Í okkar fjölskyldu telst þetta hátiðisdagur. Allir fara niður í bæ, snemma, skoða göngumenn og konur áður en lagt er í hann og spjallað við vini og kunningja. Síðan er labbað niður laugaveginn í hátíðarskapi.  Maður fyllist alltaf jafn mikilli gleði yfir öllu fólkinu sem er komið til að gleðjast með okkur og styðja við bakið á samkynhneigðum.  Ég (Ína) hef nú tekið þátt í öllum hátíðarhöldum og göngum frá árinu 1999 og ég held að það hafi aldrei verið jafn margir niðri í bæ og í gær. Það var hreinlega fólk alls staðar og maður komst varla fyrir á Arnarhóli til að fylgjast með skemmtiatriðunum. 

Um kvöldið fórum við með góðum vinum út að borða á Sjávarkjallaranum og það var alveg meiriháttar. Góður matur og mikið flissað. Að lokum skelltu hjónakornin sér á ball á Nasa og var það æðislega gaman. Páll Óskar er náttúrulega bara æði.  Reyndar fannst mér (Ínu) bassinn stilltur full hátt því húsið nötraði og skalf en sennilega er þetta ellimerki.  Fórum af Nasa þegar okkur fannst fólk orðið of fullt og búið að hleypa allt of mörgum inn. Kíktum aðeins við á Organ en vorum komnar upp í rúm rúmlega hálf þrjú.

Laufey passaði Þóri með aðstoð Hörpu vinkonu sinnar og gisti hann inni hjá þeim þannig að mæðurnar gátu sofið aðeins út.  Það er svo frábært að eiga svona góða dóttur sem er hægt að treysta svona vel .

Þórisupdate:  Þórir er u.þ.b. 9,5 mánaða. Hann er kominn með fyrstu tönnina en mamma Ína fann hana á fimmtudaginn 7. ágúst klukkan 5.  Tönnin sést þó ekki ennþá en það heyrist greinilega í henni. Hann er byrjaður að sýna hvað hann er stór og klappar alveg svakalega vel, hann byrjaði á þessu hvoru tveggja á Hóli 25. – 30. júlí.  Hann stendur upp og sest niður hvar og hvenær sem er og er aðeins byrjaður að labba með.  Hann skríður um allt og gerir það eins og mælt er með, hann er sem sagt hættur að skúra gólfið með bubuunni (skreið áður eins og selur).  Þórir kanna að segja þrjú orð alveg greinilega það eru mamma, dudda og út.  Allt mjög mikilvæg orð í lífi hans.  Já og eins og sést á myndunum þá er hann ekki lengur rauðbrúnhærður heldur algjör glókollur. 

Loksins eru allar myndirnar frá Spáni komnar inn en það gerðist í nokkrum atrennum  (sjá hér: http://flickr.com/photos/rokkfamily/) Það koma seinna myndir frá Gay Pride, útilegum, ættarmóti Hannesarættarinnar, sextugsafmæli pabba (Hannesar), dvöl á Hóli á Bolungavík og síðast en ekki síst frá ferðinni okkar að ströndum.  Þetta er bunki af 500 myndum sem þarf að sortera, yfirfara, skerpa á og loks setja á netið. Þetta tekur allt sinn tíma en stefnt er að því að setja þetta inn áður en alvara lífsins byrjar í lok ágúst þ.e. vinna og skóli…..Þórir byrjar einmitt hjá dagmömmu 1. sept.

Sýnishorn af myndum frá Spáni:

Elsku vinir, fjölskylda og aðrir sem ramba inn á síðuna.

Það er allt meiriháttar að frétta af rokkfjölskyldunni. Við erum bara allt of uppteknar til að blogga.  Á milli þess sem við eltum orminn okkar (lesist Þóri Sólbjart) þá erum við á faraldsfæti. Búnar að fara til Boston og Spánar og svo skelltum við okkur á nýjan tjaldvagn um daginn og erum búnar að vera í 2 mögnuðum útilegum. Í annarri lentum við í hitabylgju en í hinni í “flóðbylgju”, það var svo mikil rigning. 

Þórir Sólbjartur dafnar svakalega vel, jafnvel of vel.  Hann er byrjaður að safna smá ístrubelg sem hann skautar um íbúðina á. Hann skríður nefnilega ekki eins og flestir krakkar heldur ormast hann um með því að draga sig áfram á bumbunni og tærnar hjálpa líka til. Á Spáni tók hann svo massa miklum framförum að við  ákváðum að pakka göngugrindinni þannig að hún hefur ekki verið í notkun í 2 mánuði núna.  Það er ekki enn komin tönn þó hann sé að verða 9 mánaða eftir nokkra daga.  Hárið sem var rauðbrúnt er eiginlega bara hvítt, hann er algjör glókollur (þið sjáið það betur í næstu myndaseríu sem ég ætla að reyna að setja inn í næstu viku).

 Það eru komnar inn myndir frá því í maí en þá fórum við m.a. til Boston með Thor Sunshine og slóg hann feitt í gegn hjá Könunum….  Við ætlum að reyna að setja inn myndir frá júní (t.d. Spáni) áður en við förum í næsta langa ferðalag en á fimmtudaginn höldum við í tveggja vikna ferðalag um Vestfirði og Strandir. Byrjum á Bolungavík þar sem fjölskyldan mín (Ínu) á hús og ferðumst eitthvað út frá því og förum svo á Dranga á Ströndum þar sem fjölskylda Kiddu á hús.  Erum núna á leiðinni á Laugavatn í sextugsafmæli föður míns sem á afmæli á morgun. Þar verður slegið upp mini útihátíð. 

 Video af Poja í baði (pínu gamalt)

Þar til næst…..

Mig langar að byrja á að þakka kærlega fyrir allar kveðjurnar bæði hér á síðunni og með SMS í tilefni afmælisins míns og prófloka sem vill nú svo skemmtilega til að voru sama daginn (28. apríl).  Í tilefni dagsins brugðum við stelpurnar okkur af bæ og fórum á Tapas barinn.  Þar rifjuðum við upp góða takta frá því í ferðalagi okkar um Spán í fyrra.  Við pöntuðum okkur 12 rétti, Laufey var strax með á hreinu hvað hún vildi. Hún pantaði sér kengúru, pírí pírí kjúkling, hvítlaukssnigla og patatas bravas.  Kidda var á hefðbundnari nótum, lamb í lakkríssósu, nautakjöt í teríakí sósu, humar í hvítlauk og túnfiskur.  Ég fékk hins vegar 4 rétti að vali kokksins og fékk reyktan lunda í bláberjabrennivínssósu, hörpuskel í beikondöðluvafningi, lambaspjót og humar/hörpuskel í einhverri gratineringu.  Þetta var allt meiriháttar gott en við vorum þó sammála um að lundinn stóð uppúr, þá hörpuskelin í beikondöluvafningi og kengúran.  Namminamminamm…..  vonandi verður góður tapas staður þar sem við verðum á Mallorca í sumar.

 Já við rokkfjölskyldan erum sem sagt að fara að bregða fyrir okkur betri fætinum í sumar.  Ferðalögin byrja reyndar strax í á morgun (4. maí) en þá fer ég til New York og þaðan til Boston á námskeið í persónulegum fjárfestingum.  Kidda og Þórir munu svo koma til Boston á fimmtudaginn og þá verður tekið á því í búðunum.  Þórir verður bara ólaður niður í vagninn og við örkum af stað….Laufey greyjið verður skilin eftir heima þar sem hún er hætt á brjósti en hún fær kannski sokkapar til að bæta það upp.  Heimkoma 13. maí.

28. maí verður síðan haldið til Mallorca í boði ma og pa a la grande í Innri Njarðvík town.  Þau eru sem sagt að verða sextug í sumar og ákváðu að bjóða “hele familien” með í utanlandsferð.  Þetta verða s.s. 2 ömmur, mamma og pabbi, systkyni mín 3, einn maki og 14 börn á aldreinum 6 mánaða til 14,5 árs.  Já og síðast en ekki síst Lilja móðursystir .  Við verðum á Mallorca í 3 vikur en fyrstu vikuna verðum við bara með Ella og er planið að taka ferju til Barcelona og gista þar eina nótt.

Síðar í sumar er stefnan tekin á Dranga, í Bolungavík, á ættarmót og til Gautaborgar.  Og hvað þurfa konur ekki að vinna?  Ég er s.s. hætt hjá HugAx og er með tvennt annað í pípunum sem ekki er hægt að segja frá strax.   Sumarið verður sem sagt hlaðið orlofi.  Ekkert smá gaman.

Ég veit að margir kíkja inná síðuna til að fá fréttir af Þóri litla Sólbjarti Ínusyni Rokk og loksins koma þær.  Loksins er drengurinn orðinn kenndur við Ínu mömmu sína eftir smá þras við þjóðskrá.  Það virðist hið flóknasta mál að fá hann kenndan við hina mömmuna, þeir krefjast skriflegrar yfirlýsingar frá læknastofunni og okkur og alls kyns rugl. Hins vegar ef kona heldur fram hjá manninum sínum þá verður sá lausaleikskrói sjálfkrafa kenndur við eiginmanninn og enginn er spurður að neinu.  Sem sagt allt of flókið kerfi utan um ekki neitt.

Þórir varð 6 mánaða núna 27 apríl og er orðinn algjör gaur. Hann tók fyrstu veltuna á eigin vegum þann 11. apríl en núna veltir hann sér hring eftir hring í báðar áttir.  Hann er líka farinn að sitja og svo labbar hann um allt í göngugrindinni. Svo ég tali nú ekki um hvað hann er sjúklega handóður. Ég veit ekki hvort þetta sé alveg normal fyrir ekki eldra barn, mér finndist hann allavega alveg mega vera lilli dúlli aðeins lengur .  Hann er líka farinn að borða fjölbreyttari fæðu, kartöflur og grænmeti, ávexti og grauta.  Það bólar hins vegar ekkert á tönnslunum sem við vorum sannfærðar um að kæmu snemma.  Hann er s.s. tannlaus greyjið…..

Þórir er þó alveg einstaklega tillitsamur. Til að mynda þá varð hann veikur í fyrsta skipti eftir hádegi daginn sem ég kláraði prófin.  Við Þórir erum því búin að vera tvö innilokuð alla vikuna því Kidda var að leggja parket og fleira.  Hann er nú allur að koma til núna en við þurftum að fá smá púst fyrir hann.  Eyrun hafa þó sloppið hingað til 7-9-13.  Það er algjör lúxus að vera með heimilislækni í fjölskyldunni sem getur tékkað á því þegar mömmurnar fá panic attac.

Ég er að vinna í því að hlaða inn myndum frá því í mars en það tekur heila eilífð.  Gæti verið vegna þess að tölvan er þráðlaus, er þó ekki viss.  Kíkið endilega beint á myndasíðuna okkar http://www.flickr.com/photos/rokkfamily/.

Þeir sem eru enn að lesa eru ekkert smá duglegir því þetta er orðin svakalega langur texti en svona er það þegar maður er of upptekinn til að blogga reglulega.

Kveðja frá Rokkfjölskyldunni – Ína Björk